მასობრივი მოტყუების იარაღი

ატომურ თავდასხმასთან და ბიოლოგიური იარაღის გამოყენებასთან დაკავშირებული დეზინფორმაციით გაივსო პროკრემლისტური საინფორმაციო საშუალებებისა და ჩინური სახელმწიფო მედიის ნარატივები.

პროკრემლისტურ ეკოსისტემაში დეზინფორმაციული ნარატივის გაჩენის ნათელი მაგალითია ისტორია უკრაინის მიერ ბირთვული იარაღის შექმნის შესახებ. აღნიშნული ნარატივის მიხედვით, უკრაინას ბირთვული იარაღი რამდენიმე თვეში შეიძლებოდა შეექმნა. ამის შესახებ „ტასს“ უთხრა წყარომ რუსეთის სახელმწიფო უსაფრთხოების სააგენტოდან.

„დასავლელი ექსპერტების მიერ გაკეთებული დასკვნების თანახმად, კიევის რეჟიმი ძალიან ახლოს იყო ბირთვული ასაფეთქებელი მოწყობილობის შექმნასთან. ამისთვის საჭირო პლუტონიუმი ქვეყნის ტერიტორიაზე არსებული გადამუშავებული ბირთვული საწვავიდან ფარულად მოიპოვეს. ასეთი მოწყობილობა რამდენიმე თვეში შეიძლებოდა შეექმნათ უკრაინელ სპეციალისტებს“, უთხრა წყარომ „რიასა“ და RT-ს რუსულენოვან სამსახურს. „რიამ“ კიდევ უფრო გაზარდა ფსონი და დაამატა, რომ თითქოს აშშ-მ მიაწოდა უკრაინას პლუტონიუმი (RT DE). ამასთანავე, პროკრემლისტური გამოცემები აგრძელებენ იმის მტკიცებას, რომ თითქოს უკრაინამ ნაწილობრივ ან მთლიანად გაანადგურა და გადაიტანა ბირთვული იარაღის შექმნასთან დაკავშირებული დოკუმენტები („რია“, „დიარიო ოქტუბრე“). RT-ს რუსულენოვან სამსახურსა და VZ-ს გაუჩნდათ იდეა, რომ თითქოს ზაპოროჟიის ატომურ სადგურთან შეტაკებების მიზეზი იქ შენახული დოკუმენტები გახდა.

პროკრემლისტურ ფანტაზიებში ბირთვული იარაღის შექმნის პროგრამა საკმარისი არაა: საჭიროა ნარატივი ბირთვული იარაღის რეალური გამოყენების შესახებაც. სწორედ ამ მიზნით, „ლენტა“, „გაზეტა“, „ცარგრადი“, „რეგნუმი“, „სპუტნიკი“ და რუსეთის საელჩო ესპანეთში ამტკიცებენ, რომ თითქოს უკრაინის უსაფრთხოების სამსახური (სბუ) „აზოვის“ ბატალიონის „მებრძოლებთან“ ერთად ამზადებს პროვოკაციას, რომელიც ხარკოვის რეგიონში შესაძლო რადიოაქტიურ დაბინძურებას გულისხმობს. უბრალო დაბინძურება ეცოტავათ და „პრავდამ“ გამოგვიცხადა, რომ თითქოს ნატო ტროის ცხენივით იყენებს უკრაინას რუსეთზე ბირთვული დარტყმის განსახორციელებლად.

ბირთვული თავდასხმების მომზადებასთან ერთად, უკრაინაში ბიოლოგიურ იარაღსაც ქმნიან თურმე. ვითომდა უკრაინული ბიოლოგიური ლაბორატორიების თანამშრომლების მიერ გამოქვეყნებული რამდენიმე „ოფიციალური“ დოკუმენტის გავრცელებით კრემლის პროპაგანდა (RT-ს რუსულენოვანი სამსახური, RT DE, ტელეარხი „ზვეზდა“, „რია“, „რია ტელეგრამზე“) ცდილობს, დაგვაჯეროს, რომ უკრაინაში ბიოლოგიური იარაღის კომპონენტები რუსეთის ტერიტორიის სიახლოვეს

რუსეთის თავდაცვის სამინისტროს მიერ შემოთავაზებული სიუჟეტის მიხედვით, კიევმა სასწრაფოდ სცადა აშშ-ის თავდაცვის დეპარტამენტის მიერ დაფინანსებული სამხედრო ბიოლოგიური პროგრამის კვალის დაფარვა. ასეთ ინფორმაციას ავრცელებს „რია“ და „პრავდა“. ეს ამბავი დიპლომატიურმა ანგარიშებმა აიტაცეს „ტვიტერზე“ (საგარეო საქმეთა სამინისტრო, რუსეთის საელჩო ესპანეთში, რუსეთის საელჩო ჩრდილოეთ მაკედონიაში). დიპლომატიური ანგარიშებით ასევე გაავრცელეს ვებსაიტი, რომელზეც აღნიშნული დოკუმენტები ონლაინ იყო ხელმისაწვდომი. ამასთან ერთად, ისეთმა პროკრემლისტურმა საშუალებებმა, როგორიცაა „პრავდა“, „ვეტერანს თუდეი“, „ანტი-შპიგელი“ და „ჯერნალ ნეო“ გაავრცელეს ინფორმაცია, რომ რუსეთმა გამოაქვეყნა დოკუმენტები, რომელთა თანახმად, აშშ რუსეთზე არა მხოლოდ ბირთვულ დარტყმას ამზადებდა, არამედ დონბასში ბიოლოგიური იარაღის გამოყენებასაც გეგმავდა.

ჩინეთის საგარეო საქმეთა სამინისტრომ და მასთან აფილირებულმა მედიამ რუსეთს მხარი აუბა და გააცოცხლა ძველი, უკვე გაშიფრული პროკრემლისტური კონსპირაციული ნარატივი აშშ-ის ბიოლაბორატორიების შესახებ, რომლებიც თითქოს უკრაინაში და დანარჩენ მსოფლიოში მოქმედებს. გაისმა მოწოდებები აშშ-ს მიმართ, რომ მან გაამჟღავნოს ინფორმაცია თითქოს უკრაინაში არსებული ბიოლოგიური იარაღის ლაბორატორიების შესახებ და დაიცვას ისინი. მათი თქმით, აღნიშნული ლაბორატორიები დიდი ოდენობით საშიშ ვირუსებს შეიცავს, ამის საბუთად კი საეჭვო რუსული წყაროები მოჰყავთ. ჩინეთის სახელმწიფო კონტროლქვეშ მყოფმა სატელევიზიო ქსელმა CGTN-მა მთელ მსოფლიოში არსებული ამერიკული ბიოლაბორატორიები ადგილობრივ დონეზე დაავადებათა აფეთქებებს დაუკავშირა. საბოლოო ჯამში, ჩინეთის სახელმწიფო კონტროლქვეშ მყოფი მედია უკრაინაში მიმდინარე მოვლენების გაშუქებისას ძირითადად რუსულ წყაროებს ეყრდნობა და როგორც მინიმუმ, კრემლის ნარატივებს უჭერს მხარს და აძლიერებს.

მასობრივი განადგურების იარაღის სამყაროს გარეთ, ჟენევაში რუსეთის მისია გაეროში რჩება დეზინფორმაციული კამპანიის #DonbassTragedy ეპიცენტრად და სოციალური მედიის რამდენიმე პლატფორმაზე ავრცელებს კონტენტს. 1 მარტის შემდეგ ამ კამპანიაში ჩართულმა საინფორმაციო საშუალებებმა გამოაქვეყნეს ვიდეოები, „ოფიციალური“ დოკუმენტები და Prezi-ს პრეზენტაციები და ასე სცადეს უკვე გაშიფრული „გენოციდის“ საბაბის გავრცელება ჰეშტეგით #DonbassTragedy. ეს კონტენტი, რომელიც ხშირად დამაბნეველი და ძალადობრივია მოგვიანებით აიტაცა 60-მა რუსულმა დიპლომატიურმა ანგარიშმა „ტვიტერზე“, „ფეისბუქზე“, „ინსტაგრამსა“ და „ტელეგრამზე“. ჰეშტეგის გამოყენების პირველი შემთხვევა ჟენევაში რუსეთის მისიის ანგარიშებზე დაფიქსირდა და დღემდე გრძელდება ტოქსიკური კონტენტის გავრცელება.