ყველა გზა უკრაინაში მიდის: როგორ იყენებს რუსეთი დეზინფორმაციას კონფლიქტის ზონაში მოქმედებების მხარდასაჭერად
უკრაინის საზღვარზე წამოწყებულ ავანტიურაში რუსეთი ფსონების ზრდას აგრძელებს და უკრაინა კიდევ ერთხელ ხდება ფაქტების დამახინჯების, ყურადღების გადატანისა და დაშინების მთავარი სამიზნე.
უკრაინა ხშირად არის პროკრემლისტური დეზინფორმაციის სამიზნე. ჩვენ აღმოვაჩინეთ, კატალოგში შევიტანეთ, გამოვამჟღავნეთ და სააშკარაოზე გამოვიტანეთ 13500-ზე მეტი შემთხვევა. უკრაინა ნახსენებია 5200-ზე მეტ ნიმუშში. ეს რიცხვი EUvsDisinfo-ს მონაცემთა ბაზაში თავმოყრილი შემთხვევების თითქმის 40 პროცენტს შეადგენს.
პროკრემლისტური სადეზინფორმაციო ეკოსისტემა თავს გვახვევს ტყუილებს უკრაინის შესახებ და სიმართლის დანახვა დღითიდღე რთულდება. ამიტომ, ჩვენ გამოვაქვეყნეთ მითების გამაქარწყლებელი სტატია, რომელშიც განვიხილეთ ყველაზე გავრცელებული და სახიფათო მითები და ხშირ შემთხვევაში, დაუფარავი ტყუილები, რომლებიც რუსეთ-უკრაინის კონფლიქტს უკავშირდება.
ყველაფერი დასავლეთს ბრალდება
უკრაინის გასაშავებლად და თავის მიერვე შექმნილი დაძაბულობის გარშემო დაბნეულობის გამოსაწვევად რუსეთს გაჩაღებული აქვს ფართო კამპანია, რომელშიც ორი ნარატივი გამოიკვეთა. პირველ რიგში, ის, რომ თითქოს უკრაინას დასავლეთი იყენებს. რამდენიმე გამოცემა ცდილობდა ისე წარმოჩენას, რომ თითქოს უკრაინას დასავლეთის ქვეყნები რუსეთის დესტაბილიზაციის და მასზე გავლენის მოხდენის ინსტრუმენტად იყენებენ. ტრადიციას არ უღალატეს და განსაკუთრებული ყურადღება დაუთმეს როგორც აშშ-ს, ისე დიდ ბრიტანეთს.
ეს კარგად ჩამოყალიბებული მოდელი ჩანს, რადგან მუდმივად ვაწყდებით ისტორიებს იმის შესახებ, რომ „აშშ უკრაინის ფანტომს იყენებს რუსეთთან კონფრონტაციისთვის“, „აშშ-ის, დიდი ბრიტანეთისა და კანადის ხელში უკრაინა შესანგრევ იარაღს ჰგავს“ და სხვა. თითქოს ეს ყველაფერი უკვე საკმარისად სასაცილო არ იყოს, პროკრემლისტური მედიასაშუალებები უფრო შორს მიდიან და ახლა ამტკიცებენ, რომ „უკრაინა უკვე ოკუპირებულია აშშ-ის და მისი სატელიტების მიერ“.
მეორე ძირითადი თვალშისაცემი ნარატივია იმის მტკიცება, რომ თითქოს დასავლეთი „სხვისი დროშის ქვეშ ოპერაციის“ ჩატარებას გეგმავს, რათა უკრაინის საზღვართან თავმოყრილ რუსულ ძალებთან პირდაპირი შეტაკება გამოიწვიოს. ამ ნარატივს სხვადასხვა ფორმით ავრცელებენ, მათ შორის, დასავლეთს ადანაშაულებენ საინფორმაციო სივრცეში მოწყობილ პროვოკაციებში და აცხადებენ, რომ დასავლელი ინსტრუქტორები ცხელ წერტილს ქმნიან რუსეთის საზღვართან. თუ ეს განცხადებები გეცნობათ, გასაკვირი არაფერია. პროკრემლისტური დეზინფორმატორები დიდი ხანია ამტკიცებენ, რომ თითქოს დასავლეთი ატარებს „ოპერაციებს სხვისი დროშის ქვეშ“ და ნატო ალყაში აქცევს რუსეთს.
უკრაინა დასავლეთის ინსტრუმენტია რუსეთის წინააღმდეგ.
უკრაინაში ამერიკაა შეჭრილი და არა რუსეთი, როგორ ამას წარმოაჩენენ
დასავლეთი უკრაინაში პროვოკაციებს ამზადებს
ნატო დაპირისპირებისთვის შეიქმნა და არა თავდაცვისთვის
ყველაფერი ერთმანეთთანაა დაკავშირებული. ან შეიძლება არა?
პროკრემლისტური დეზინფორმატორები ბევრი რამით ჰგვანან იმ ადამიანებს, რომელთაც შეთქმულებების სჯერათ. ისინი კავშირებს ხედავენ იქაც კი, სადაც ისინი არ არსებობს. უკრაინა ამჟამად მათი ძალისხმევის ძირითადი სამიზნეა. ამიტომ, ყაზახეთში გამართული საპროტესტო აქციების გადაბრალება სცადეს უკრაინის საიდუმლო სამსახურისთვის, რომელიც თითქოს „კოორდინაციას უწევდა პოგრომისტებს ყაზახეთში“. თუმცა, უკრაინა ერთადერთი ბრალდებული არ ყოფილა.
ზოგიერთ მედიასაშუალებაში უკრაინის დადანაშაულებას სხვა მედიასაშუალებებისთვის ხელი არ შეუშლია აშშ-ის დადანაშაულებაში. ეს უკანასკნელნი ამტკიცებდნენ, რომ თითქოს აშშ უწევდა კოორდინაციას საპროტესტო აქციებს ყაზახეთში იმ მიზნით, რომ რუსეთზე ზეწოლა მოეხდინა უსაფრთხოების საკითხებთან დაკავშირებით აშშ-სა და რუსეთს შორის ჟენევაში დაგეგმილი მოლაპარაკებების წინ. მედიასაშუალებების ერთმა ჯგუფმა თითი „უცხო ხელისკენ“ გაიშვირა ისე, რომ არათუ სანდო მტკიცებულება, არამედ საერთოდ არანაირი დამადასტურებელი საბუთი არ წარმოუდგენია.
ეს პროკრემლისტური სადეზინფორმაციო მედიასაშუალებების კიდევ ერთი ნაცნობი სვლაა — მთელი მსოფლიოს მასშტაბით სახალხო საპროტესტო აქციებს დამახინჯებულად აშუქებენ და საზღვარგარეთიდან დაგეგმილ პროვოკაციად წარმოაჩენენ, საზღვარგარეთში კი ხშირად აშშ-სა და დასავლეთს გულისხმობენ.
ნატო, როგორც აგრესორი და რუსეთი, როგორც გატეხილი პირობის მსხვერპლი (თუმცა, ასეთი პირობა არავის დაუდია)
შიგადაშიგ ამოტივტივდება ხოლმე კრემლის დეზინფორმაციის სახელმძღვანელოს კიდევ ერთი ლაიტმოტივი. კერძოდ, მტკიცება, რომ ნატო აგრესიული სამხედრო ბლოკია, რომლის მთავარი მიზანი რუსეთისთვის ზიანის მიყენებაა. ამ გაცვეთილ თემას განუწყვეტლივ ატრიალებდნენ ბოლო ორი კვირის განმავლობაში, როგორც მოსალოდნელი იყო რუსეთის პოზიციონირების გათვალისწინებით. შეუძლებელია, დემაგოგიამ მადეზორიენტირებელი გავლენა არ მოახდინოს მის შემოქმედზე, თუ კრემლივით დიდხანს დაკავდება ამ საქმით.
კრემლის დაბნეულობა ნატოს მცდარად წარმოჩენითა და ვერგაგებით არ შემოიფარგლება. როგორც ჩანს, ისინი ვერც დემოკრატიულ ქვეყნებს შორის ნებაყოფლობითი ალიანსების კონცეფციას იაზრებენ და ამტკიცებენ, რომ ნატოს მოტყუებით შეჰყავს უკრაინა და სკანდინავიის ქვეყნები ბლოკში და თითქოს ნატომ აღმოსავლეთ და ცენტრალურ ევროპაში არგაფართოების პირობა დადო ჯერ კიდევ 1990 წელს. ნატოს წევრობის შესახებ გადაწყვეტილებას ყოველი ცალკეული აპლიკანტი და დღეის მდგომარეობით, ნატოს 30 მოკავშირე იღებს. საკუთარი გზის არჩევა თითოეულ სუვერენულ ქვეყანას შეუძლია და მოსაზღვრე ქვეყნებს. ამ შემთხვევაში, რუსეთს ჩარევის უფლება არ აქვს.
ამ კვირაში გავრცელებული პროკრემლისტური დეზინფორმაციის სხვა ნიმუშები:
- „ვაგნერი“ მალიში არ იმყოფება: ნამდვილად იქ არიან, ეჭვი არ შეგეპაროთ. ჰკითხეთ ადგილობრივ ხელისუფლებას და საფრანგეთის მთავრობას.
- დასავლურ მასმედიასა და სოციალურ მედიას დასავლური მთავრობები აკონტროლებენ: რა თქმა უნდა, ეს უბრალოდ აბსურდია, მაგრამ ამავდროულად, გულწრფელი შეცდომაცაა, რადგან ამ ხალხს სარედაქციო დამოუკიდებლობის კონცეფციისთვის ყური არ მოუკრავთ.